Nsang Awng La a Hkrangbung Sumla hpe Manau Wang Kaw Galaw Na Masing Hte Seng Nna Freelance ,Independent Researcher Rev.Hka Len Tu Hkawng a Ningmu

Nsang Aung La / Photo : fb

Nsang Awng La a Hkrangbung Sumla hpe Manau Wang kaw galaw na masing hte seng nna, loi mi bawngban mayu ai.

Shakawn shagrau ging ai lam re..Shada da shagrau hkat ai mung mai kaja ai lam re...Nsang Awng La zawn ningtawn ai mung bai pru na n loi nga ai.

Raitim, Shawa yawng hte seng ai shara kaw aten galu galaw tawn na lamang re majaw, Qualification Policy hpe shawng ka jahkrat nna galaw lu yang kaja ai.

Shagrau sha-a committee hpe mung Nsang Awng La a matu laksan committee hpaw ai hku n re ai sha, shawng de na ni, hpang de bai pru wa na ni, kadai mi ninghtawn ai pru wa tim, policy hta shang ai kadai hpe tim shagrau lu na matu dinggrin committee hpaw sa wa yang kaja na re, ngu mu mada ai.

Policy ka jahkrat ai shaloi myit yu lu na matu lawu na lawnglam ni hpe tang madun mayu ai..

***********

(1) Gara madang hpe shagrau na? Mungkan e mying kaba ai MMA Organization ni grai law ai kaw gara Organization a champion hpe madung lata na? One championship (Singapore) hpe sha madung lata na i? Kaga MMA Organization kaw na pru wa yang gara hku? Organization madang (Standard) ni hpe gara hku masat na (Norm)?

(2) Hpa baw ginsup hpan ni hpe shagrau na? MMA hpe sha myit sana i? Gawdin, Olympic ginsup hpan amyu myu (Criteria)?

(3) Galoi ten kaw na hpang nna shagrau na? (moi de Olympic ningtawn ningkrin ni mung nga lai wa yu sai)

(4) Kaning re ai ni hpe shagrau na?

(5) Budget kade ram madang hku shagrau na? Dinggrin Budget nga hkra gara hku masing jahkrat na?

(6) Kadai ni hpe lit jaw na (ownership)?

(7) Shagrau ging ai masha lata san ai ladat hpe gara hku masing jahkrat na (Candidate Screening Process)?

*** Ndai hku n galaw lu yang gaw, rapra ai lam hta ningra wa na shadu ai.

Shakut nna galaw woi awn ai ni yawng a ntsa Karai Kasang kaw na grau ai atsam jaw myit ga...

Ngai gaw Shagrau Ging ai ni hpe shagrau ga, ngu ai hpe myit hkrum ai wa re.

Raitim, myiman lata nna shagrau ai hpe gaw n-gun n jaw ai.

Nsang Awng La, ngai na jinghku re, Moi na Olympic Champion dingsa ni hpe ngai n chye ai.

Raitim, shagrau ging ai hpe masha miman yu ai hku n re sha, policy jahkrat nna tara jashang ga ngu mayu ai lam sha re.

Nsang Awng La gaw Singapore Miwa lauban langai a One Championship (Company)(https://www.onefc.com) a world Champion rai nga ai. Mungkan hta One Championship company zawn re ai MMA company grai law ai. One Championship company hpe Myen mung kaw franchise la nna galaw sha ai gaw U Khin Shwe a kasha, Nandar Hlaing na madu wa rai nga ai.

Olympic chyawm gaw Mungkan ting hte seng ai Organization kaba rai nna, Mungdan shagu na Mungdan a gawng malai shingjawng ai shara rai nga ai.

Ngai kaya hkrum ai lam langai sakse hkam mayu ai. Moi de MMA ngu hpe ngai hkrak n chye ai. Nsang Awng La gaw world champion rai sai, ngu ai hte grai kabu arawng la let, du ai shara shagu kaw ngai Kachin re lam n chye ai ni hpe Nsang Awng La na amyu re lam shakut nna tsun dan yu ai.

Dik hkra, USA kaw ngai hkrum katut ai Maigan amyu ni Nsang Awng La hpe kadai n chye ma ai. USA kaw mying kaba ai MMA gaw UFC (Ultimate Fight Championship) ngu ai she rai ma ai da. Mungkan e MMA Champion langai sha nga ai baw shadu ai wa, grai law ai she rai nga ai. Myen Mung madang mying kaba ai chyawm gaw tsun n ra rai nga ai.

Dai majaw, kade ram awng dang ai hpe shagrau na? ngu ai shadawn chitna policy hpe shawng ka jahkrat nna, Nsang Awng La hpe mung shagrau ga, dai hte maren kadai hpe raitim, MMA ginsup hpan sha n rai, kaga ginsup hpan amyu myu, ningtawn ai hpan amyu myu a matu jawm shakut ga, ngu mayu ai lam re.

Nang hpa mung n lu galaw ai wa dinglun sha chye i, ngu tim hkam la ai... raitim yawng hte seng ai Manau Wang kaw shadun na nga majaw, ngai hte mung seng kun, ngu she re.

Hkungga let,

Hkalen Uma