Covid machyi masha ni hpe yu lakawn na Ramma ni / Photo: CJ

Myanmar mungdan hta Covid-19 kap bra ana zinli numdaw (3) lang hku nna n-gun kaba hte laja lana chyam bra wa ai majaw Mung masha law law jam jau hkrum sha nga ma ai.

Mung masa mayak lam ni byin wa nna makawp maga tsi tau hkrau n lu htu ai hte ana zinli n byin hkra makawp maga lai ladat ni jai lang let jawm ninghkap ti mung ya ten hta Mungdan kata shara shagu Mare Kahtawng shagu ngu na daram hta covid ana kap hkrum masha law wa  nna asak si sum ai ni law law nga ai lam chye lu ai.

Covid ana kap hkrum machyi masha ni hte sama n lu အနံ့ပျောက် masha ni hpe tsi gawn ai lajang lanu lahku ai lam ni  ya na Mungdan Asuya kawn tang du hkra n lu galaw ya lu ai majaw Yangon, Mandalay hte Sagaing Ginwang hkan oxygen dinghprut mat nna asak si sum nga ai ni  lani mi hta tsa kaba nga nna Oxygen lu na matu laja lana  tam shakut nga ai ni mung law law rai nga ma ai lam ta tut hkrum katut ai ni tsun ai shiga ni hte maren chye lu nga ai.

Jinghpaw Mungdaw hta ya ten Mai Ja Yang, Manmaw hte Myitkyina hkan na dum nta ni hta grai ni htep ai hku covid-19 byin hkrum hkra nga sai rai nna Mai Ja Yang kaw ana kap hkrum masha 500 jan nga ai lam chye lu ai.

Dai zawn byin ai masa lam ni hpe mu mada wa ai majaw ya ten hta Nawku Hpung ni kawn shang lawm let Covid ana kap hkrum masha ni hpe hkye mawai  tsi lajang ai lam ni galaw lu na matu hkyen lajang nga ma ai.

Myanmar Mungdan Kahtawlik Saradaw Uhpung CBCM (Catholic Bishops’ Conference of Myanmar),  Hkam Ja Dap ECHPC (Escopal COmmissionm for Health Pastoral Care)  kawn Numdaw 3 Covid-19 kap bra ana zinli  ninghkap na ladat lam ni hte Nawku hpung ni hkan sa ra ai lam ni hpe ndau shapraw da sai rai nna Sasana Ginwang kata Covid-19 ninghkap shamu shamawt ai lam ni ta tut galaw nga ma ai.

Myitkyina Sasana Covid-19 ninghkap makawp maga Komiti kawn  San Columban La Boarder kaw Care Center ngu ai hpaw ninghtan da let laja lana byin ai machyi masha masha ni hpe tsi tsi gawn lajang na matu shajin nga ma ai lam chye lu ai.

KBC kaw nna mung ya ten hta Ana Zinli mabyin masa hta hkan nna ra ahkyak nga ai Oxygen Generator gawng kri nna dawjau lu hkra hkyen lajang nga ma ai. Sen hkying mi sanit tsa jan ( 173,250.000) ma ra na  Oxygen htuk shapraw jak hpe lu na matu yawng shang lawm sa wa ga nga nna saw shaga da nga ai.

Ya ten hta Covid-19 laja lana bai byin wa ai majaw laika sharin Jawng ni yawng pat da ai rai nna, rau jawm hpawng let Nawku Dawjau ai lam ni hpe mung jahkring nhtawm Online internet lam yan hku Nawku shang lawm let sasana amu magam ni hpe galaw nga ai rai nga ai.

Mungdan Uphkang Kongsi hkam ja dap kawn July 18 ya shana htuk shapraw da ai hta, dai ni du hkra rai yang Mungdan kata Covid-19 positive byin ai masha 229,521 rai nna marai 5,000 asak sum mat sai re lam chye lu ga ai.

Thomas