Kachin Channel: mungga

Showing posts with label mungga. Show all posts

11 December, 2017

Ningmu 1:58 PM

(1) Lang na Wunpawng Amyu Sha Lam Masan Zuphpawng hta Du Daju Jum N Ban La tsun ai mungga Facts

Du Daju Jum N Ban La tsun ai mungga Facts

▄▄▄▄▄▄▄▄▄▄▄▄▄▄▄▄▄▄▄▄▄▄▄▄▄▄▄▄▄

1) KIO ni rawt malan hpang wa ai ten hta jagumhpraw, Laknak sumpum da na hpang wa ai nre,

2) KIO ni gaw laknak hpe kam nna rawt malan ai re. Mung shawa n gun hpe kam nna rawt malan wa ai she re.

3) Daini na ten hta myen hpyen dap gaw mungdan a jagumhpraw hpe lang nna mungkan madang dep Laknak hpe n hpaw n ya lu lang nga sai re.

4) Myen hpyen dap hte shingjawng na rai yang anhte laknak naw shazeng ra na re.

5) Anhte Rawt Malan Hpang wa ai shaloi gaw Awm Dawm Mungdan gaw gap na matu re.

6) Awm Dawm ai Shang Lawt lu na matu gaw

I - laknak machyu pala krung ra ai.

II. - ja gumhpraw lu ra ai.

III - masha law ra ai.

7) Daini Wunpawng Myu Sha ni masha n gun nlaw ai.

I - Kani Hkyi ya law ai

II. - Lam a myu myu a majaw mayet maya lam yawm ai.

III. - mung masa a majaw magan de chyam bra taw ai

IV. - makam masham a myu myu a magam gun ni law mat ai.

V. - gumgai dingla law ai.

IV. - Nga ai ramma ni sha mung Shang Lawt magam hta mangan nga hkra nkam gun ai. Yihku wan hkru sha rai ma ai.

Dai zawn re lam a myu myu a majaw rawt malan n gun yawm mat ai.

8) laknak gaw lu ai. Rai tim masha nhta jum dingsa dai laknak ni gaw chyasi sha rai nga ai.

9) Awm Dawm ai de du lu na matu anhte hta a tsam grai naw ra ai. Awm Dawm ai lam ra jang gaw kasat dang ra ai. Aten grai naw la ra na re.

10) Shawng de gaw laknak lang ai ni up hkang ai re majaw mung masa nmai bawng ban ai.

Ya gaw mung masha ra lata ai atsuya re majaw mung masa bawng ban sai. Mung masa shaga lu na matu a hkaw a hkang hpaw ya sai.

Rai timung shanhte ra ai mung masa de dun bang ai.

11) Laiwa sai ten hta Federal Law hpe kadai n gwi tsun ai. Hpyen dap gaw Federal ngu ai hpe mungdan zang ayai wa ai baw re ngu nna jahkrit shama let kum tawn da ai. Dai majaw rawt malan rudi masha ni kadai mung Federal lam hpe n gwi tsun ma ai. Rai tim 2009 ning hta myen hpyen dap gaw KIO/A hpe jarik sin hku galaw na matu atik anang tsun wa ai majaw KIO hku nna mung shawa zuphpawng 2,3 lang galaw nna Federal mung hpawm lam hpe tsun wa sai re. De a hpang she rawt malan rudi ni yawng mung federal lam hpe kajai wa ai re.

12) Daini na mung masa hpe tsun ga nga jang Federal sa ra re. Federal hpe sara langai hku myit mang ra ai. Anhte nnan tsun ai gaw Awm Dawm re. Rai tim dai Awm Dawm gaw shaning kade tsa ning naw na ra ai baw mi re nchye ai.

Dai majaw shawng mai byin ai Federal hpe shawng galaw ga. Teng man ai Federal mung hpawng hpe shawng gaw gap nna tinang a mungdaw rawt jat hkra shawng shakut la rai nna sa ra shatai ga. De a hpang n gun rawng wa ai shani, laknak krung ai shani sinat kalang pyi n kapaw ai sha ngai nang hte n pawng sai ngu nna Awm Dawm ndau la yang mai ai.

13) Mungdan ting hte seng ai Federal gaw da tara hpe gaw chyawm shakut ka ga.

14) Anhte Wunpawng Ni ra sharawng ai Federal hpe ka jahkrat la ga.

15) Ndai zuphpawng hta du shang lawm ai Wuhpung wuhpawng shaga na ningbaw yawng hpe kam kaba ai hte saw lajin dat ai.

Tang madun ai;

Myu (kki)

#Wechat

Jau Bu

09 December, 2017

X'mas 4:31 PM

Sweet December Mungga

Hkum Hkrit Myit

(Sweet December Mungga)

“Dai majaw lamu kasa gaw, Hkum hkrit myit; yu mu, masha nlang a matu nachying kabu gara mai ai shi ga, ngai nanhte kaw gun sa ring ngai;” (Luka 2:10)

Chyoipra ai Chyum laika hta Kabu Gara Shiga laika (Mahte, Marku, Luka, Yawhan) hta ‘hkum hkrit myit’ nga ai ga si 18 lang rawng nga ai.

Ndai lahta na chyum daw gaw Lamu Kasa ni Sagu rem ai ni kaw Madu Yesu shangai wa sai lam sa tsun dan ai shaloi tsun ai Mungga rai nga ai. Lamu Kasa ni hpa majaw “Hkum hkrit myit:” ga nhpaw tsun a ta? Dai sagu rem ai ni hkrit taw ai hpe mu chye ma ai.

Sagu Rem ai ni hpa majaw hkrit a ta?

(1) Prang yang hkan sagu rem ai ni re, nga tsun ai. Rai yang, ndai ni gaw Sahti (Lauban) ni gaw n rai na re. Hpa majaw nga yang, Israela Mungdan grup yin a du hkra ladaw gaw shani kahtet nna, shana gaw grai kashung ai shara ni rai nga ai. Prang Yang kaw sagu hpe sin nna yup ai ngu ai gaw Sahti ni a bungli n rai nga ai. Dai majaw shanhte gaw nchyang ni rai yang rai na, shing n rai yang mung Sagu rem let gawhtawt gaw-yawt nga sha hkawm ai (Gypsy) masha ni rai yang rai na.

(2) Dai ten dai zawn matsan masha ni hkrit ra ai lam baw hpan amyu myu grai nga ai. Masha mazut (Gangster) ni, Damya ni, lagut ni, Roma hpyen la ni, mayam rim dut sha ai ni, Sagu sa rim sha na dusat ni, rai nga ai.

(3) Dai majaw shanhte gaw shawng nnan mu hkrup ai masha shagu hpe hkrit ai. Grau nna, shana yuptung pawpru wa ai lamu kasa ni hpe gaw n hkrit na lam n nga nga ai.

(4) Hpa hte bung ai i nga yang, anhte Buga kahtawng ni hkan, majan byin nga ai ten, shana yuptung mare shing nawm de gwi wau yang, mare ting sadi maja ai. Hkrit ai. Shana yuptung nta chyinghka sa akawk yang nta masha yawng hkrit ai. Dai zawn rai nga ai.

(5) Dai majaw, “hkrit ai” ngu ai gaw shimlam n lu ai ni a kumla rai nga ai.

Lamu kasa ni dai hpe chye ai, dai majaw, Hkum hkrit myit; “masha nlang a matu nachying kabu gara mai ai shi ga” gun sa ai, nga tsun ai. Raitim, dai ten Herod Hkawhkam zawn re ai ni n lu kabu ma ai.

Rai yang gaw, kade matu kabu hpa shiga ta?

(1) Gritnem dik ai, dip sha hkrum ai masha ni a matu kabu hpa shiga rai nga ai.

(2) Tengman ai lam hpe marit ai ni a matu kabu hpa shiga rai nga ai.

(3) Tara Rapra ai shingnip kata kaw Tara Upadi a shimlam hkam la lu mayu ai ni a matu kabu hpa rai nga ai.

(4) Kashun kashe re ai mungkan hpe n ju ai ni a matu kabu hpa shiga rai nga ai.

(5) Matse labye Mung up du ni hpe gumlang kau mayu ai ni a matu kabu hpa shiga rai nga ai.

Herod hkawhkam zawn re ai masha wa ntsa, mung shawa a ntsa, kam ai hku dip lu dip sha pyaw dum nga ai ni a matu chyawm gaw myit kahpra hpa tai wa sai.

Dai majaw, Ehpesu 6:12 hta
"Kaning rai nme law, anhte a gasat gala ai gaw, asai yan ashan hpe n re ai sha, du agyi ni hpe mung, ahkang aya lu ai ni hpe mung, ndai sin mak nga ai mungkan a hpung dagu rawng ai ni hpe mung, sumsing lamu lahta tang e nga ai. n hkru n hkra ai nat a luksuk ni hpe mung, gasat gala nga ga ai."

Ndai Hkristmas ngu ai gaw, Tara rapra ai lam hpe marit ai anhte amyu sha ni yawng a matu Kabu Hpa Shiga tai wa na sai kam nngai.

By : Rev.Hkalen Tu Hkawng

Jau Bu