Shingkap Bum Post hpe bai lu zing sai lam shiga hte kaga majan shi ga ni

                 

              16-2-2015 ya shani hpyen n'gun (100) daram the htim gasat, sinat kaba gap sharu bun ai majaw Dung (7) ni a Putao modo lam Ntsi Yang makau na Shing Kap Bum post hpe kaga bum marawn de sit yen nga ra mat sai. 

             Ra ai lam shajin la nna 20-2-2015 ya shani htim gasat na matu kahtep sa wa yang myen ni nnga taw ai. N'gu ru agat kau ya, nta shadaw kahtam ahka ya re hpe wa mu ai. Myen dap ni gaw Ntsi Yang, Sum Pyi Yang na mung shawa ni hpe ya bai gasat jang mare nat kau ya na ngu jahkrit tsun nna Putao de 19-2-2015 ya shani lung mat wa ai lam hpang e chye lu ai.

            Feb 21, 2015 ya shana maga daw 4:20 pm ten daram hta yen kau da ai tinang KIA Masat (3) Dap Ba, Dap Dung (15) ginra Loi Ying hte Mahtan lapran na tinang KIA Gawng Dung Post hpe tinang KIA hpyen hpung ni ra ai lam ni bai shajin la, n-gun bai mahkawng la rai nna shana daw 7:00 pm ten daram hta bai wa htim gasat dat ai majaw myen dap Tat.M-(99) ni lam she n'mu rai bai hprawng htaw mat ai lam, tinang KIA dap ni hku nna yen kau ai Gawng Dung Post hpe dai shana jang bai lu la sai re lam na chye lu ai. Feb 22, 2015 ya jahpawt gaw tinang Post hpe atsawm sha bai shara la nna n-gun mung bai jat let grim rai bai wa dung nga sai lam shiga na chye lu ai.

           Feb 21, 2015 ya shani KIA Masat (3) Dap Ba, Dap Dung (15) ni a shawng lam ginra Loi Ying makau na KIA Gawng Dung Post hpe Myen dap ni wa htim gap na shawng e sha 2:00 pm ten daram hta KIO Ginjaw Laiza makau, Lazau Bum, Hpun Pyen Bum, Alen Bum, Hka Ya Bum ntsa hku nna Myen dap Jet Nbungli (2) sa pyen gawai lai mat wa ai lam shawng lam ginra na Myu Tsaw Brang ni shana wa ai.

Shiga,

        Lachid Kachin