Tinang rudi amyusha ahkaw ahkang tang madun ai shaloi, UNFC daphpawm woi awn ai amyu lakung laknak lang wuhpung yawng shanglawm let galaw na Mai Ja Yang zuphpawng a myit hkrum ai lam gaw Tsaban 21 Panglong Zuphpawng hta ahkyak madung rai na re nga, KSDP ningbaw Dr. Manam Tu Ja tsun wa sai.
Dr. Tu Ja gaw, Wunpawng Mungdan
Shanglawt Hpung KIO a Tingnyang Up Malai-2 hkringsa rai nna, dai aten KIO
ginjaw komiti dat kasa hpung ningbaw hte, rawt malan hpung 13 a ningbaw hku nna
mung, Myen hpyendap ara 2008 gawda ai tara ka ai Mungbawng Zuphpawng e
shanglawm wa sai re.
Mung shara ra lata ai NLD asuya
nnan woi awn let Munghpawm Simsa Lam Hkrumra Zuphpawng—Tsaban 21 Panglong hpe
du na August shata hta galaw hpang wa sana re.
Dai zuphpawng de rudi amyusha ni
a lu ging lu ang ai mungmasa ahkawng ahkang tang madun sa wa na re hta,
Jinghpaw mungdaw KIO sinpraw ginwang ginjaw Mai Ja Yang zuphpawng a myit hkrum
ai lam ntsa myo kata amyu lakung mungmasa pati ni madi shadaw ra na re lam, Dr.
Tu Ja ya na zawn tsun ai.
“Bawsang myusha ni hku nna Jet ai
munghpawm hte seng nna dai ni anhte ra ai hpe madung tang madun sa mat wa ra ai
hku re. Tang madun saw a ai ngu hte seng nna ndai UNFC anhte amyusha wunpawng
hpung ni hku nna e jawm myit bawng ban nna e tang madun ai gaw madung rai na
re. Rai nna Myo de nga ai pati ni hku nna shamu shamawt lam tang madun sa wa
lam ni gaw anhte laknak lang hpung ni tang madun saw a ai hte bungpre ra ai hku
re. Dai Mai Ja Yang zuphpawng kaw bawsang laknak lang hpung ni yawng lawm na
dai kaw masha tsawm ra hkum na. Dai zuphpawng kaw jawm jahkrup dat ai gaw
madung rai wa na re. Dai hte maren an hte mung masa pati ni mung tang madun mat
ra na re.”
Ya na Tsaban 21 Panglong
Zuphpawng hpe mung shawa asuya woi galaw ai re majaw shawng de hpyendap asuya
galaw ai, daru magam matut magra da yaw shada let 2008 Gaw Da Ai Tara ka ai,
Mungbawng Zuphpawng (National Convention) hte gaw shai na re, nga Dr. Tu Ja
matut tsun ai.
Mai Ja Yang Zuphpawng hpe du na
bat lahkawng jan, July 26-29 laman galaw na re. Ndai zuphpawng de amyu lakung
rawt malan hpung 21 hte wuhpung mi na dat kasa 5 hpra shanglawm na matu saw
shaga tawn ai re.
Bai nna, myo kata amyu lakung
mungmasa pati daphpawm UNA hte NBF hte Myen Mung Amyu Shayi Hpung Ginjaw (WLB)
na, dat kasa ni mung shanglawm wa na re.
Ref:
.jpg)
