Wunpawng Amyu sha ni myityu na lam 1

        Myen tai hpyen ni hku nna, anhte hpe majan htim gasat wa ai lam gaw anhte hta masha n'gun n law nga ai hpe chye ai majaw rai nna, Wunpawng ramma ni yawng mung hpyen la tai n kam ai, hkrit ma sai hpe atsawm chye da na re ngu mu mada ai. KIA hku nna post ni tat kau ra ai hpe Wunpawng Amyu Mungchying sha ni mara chye shagun nga ma ai. 

          Hpa majaw tat kau ra ai ngu hpe yu ai shaloi tai hpyen wa gaw masha n'gun kaba hte htim gasat wa nna tinang maga gaw dingla 2-3 sha ninghkap rai, hpang jahtum asak sum wa na tai ai majaw post hpe tat kau da ra mat sai. Asak sum hkam jang mung mi na n law nga ai masha grau yawm na maga de she rai wa na tai nga ai hpe anhte myit dum ya ra ai. Daini anhte ni gaw Wunpawng Mungdan hpe gaw ra nna,anhte wunpawng myu sha ni  tatut shang lawm ai lam nnga yang Mungdan lu wa na kun? byin wa na kun? myityu shajang ga. 

           Myu hte Mungdan a matu apnawng taw nga ai Myu Tsaw share ninghkring ni grai law nga ai zawn,n-gup gaw daw raw ,ta gaw lahkraw re ai myu sha ni law law nga ai hpe mu lu ai.Grau nna gaw anhte Jinghpaw Mung mare kaba hkan nga ai mare masha ni law malawng re.Tinang a dinghku,tinang a prat,tinang amyu ru sai ni sha galu kaba lu su wa na ,shim lum lam lu  na matu sha galaw ai ni grai law ai.Myu sha ni yawng a matu n kau ni ja gumhpraw hte,hpa ji hte shang lawm ai ni nga ai zawn , hpa ji chye jang Myu sha ni a matu ap nawng na n myit ai anhte Jinghpaw Myu sha ni grai myit yu ra ai.Hpaji chye ai law law shang lawm jang she awng dang lam lu na matu mung lawan na re.Ya na zawn anhte Shanglawt hpyen dap kaw,shwng lam majan pa kaw lapran tsang pi n awng ai hpyen ma ni,dingla ni,Myu mare kaba de pi n du ga,Mawdaw pi n jawn ga  ai anhte bumga na masha ni hkrai hkrai rai jang hpa lam hta mung hpang hkrat wa chye ai.Hpang de na matu mung myit tsang shara re.

           Dai Wunpawng Mungdan gaw gap la na matu, ya jang Mungdan magam lit gunhpai shajang saga.Shiga sha hti madat nna tsun chyai nga na n mai sai. Hpyen n'gun n nga yang gaw anhte ni hta hpyen majan naw nga nga na re. Myu sha ni roi rip hkrum nga ding yan re na re. Galoi mung hkrit maja nga ra na re. Dai lam ni ma hkra kaw na lawt lu na matu anhte lu ai atsam hte Myu hte Mungdan a matu aten ladaw mi apnawng saga ngu n-gun jaw dat nngai.

By-

     Mazup Tu.

     Kachin Channel.