 |
| Sumla:internet |
Wunpawng
Mung dan Shanglawt Asuya Kaw nna yu reng uphkang nga ai Laiza Muk Lum Mare Kaba
ndai gaw lani hte lani, Laning hte laning yu nga ninglen grau grau rawt jat
galu kaba dam lada tsawm htap wa nga ding yang re ai mare langai mi rai nga ai.
Hpa majaw nga yang Wunpawng Mungdan a mare daju rai nga ai Myikyina Mare Kaba
hte Manmaw Mare kaba lahkawng a ka-ang rai nna Miwa Gumsan Mungdan Yin Jang
Mare kaba kaw nna Wunpawng Mung-dan de mawdaw lam htu Jahkrang madi tawn da ai
jarit mare langai mi rai nga ai majaw, hpawt hpra kashu kasha ni a prat hta
grau nna, rawt jat maden zinghka wa mai ai mare kaba langai mi rai nga ai.
Dai
majaw, ndai mare rawt jat galu kaba wa ai labau hpe chye ai myit su salang ni
law law nga ai zawn, ndai mare rawt jat galu gaba wa ai labau hpe n chye ai
kashu kasha ni law law nga nga ai ni chye da lu na matu mare rawt jat galu kaba
wa ai labau kadun hte Buga Gaw Sharawtlam labau kadun hpe lawu de na hte maren
kadun mi shachyen ya dat nngai.
Laiza
ngu ai shingteng amying hpe dep hkap ai made san sagawn wa yu ai shaloi mi moi
ndai Laiza krung gaw Maling mala, Maling teng hkreng masha nau n shang ai
jigrawng, mayan, Wawt sawng ai Ji Nat matse ai lamu ga n sa ja ai shara, Laiza
Hka mung danam yak ai hka, Hka hpunla ja ai shara hkrai re.
Miwa
Mung na hpaga la ni,tinang Wunpawng Mungdan kata de hpaga ga hkawm ai ni,
Jinghku Jingyu jahkrum hkawm ai ni, lai sa lai wa rai yang, Hka rap ai shaloi
Hka hpungla ja nna yawng si ai law law nga ai, hka n yawng si tim lamu ga nsa
ja, Ji nat matse ai majaw lai wa, lai sa ni dum n’ta du wa nna, machyi si ai
law law byin ai, lai wa lai sa ni za ma ai re majaw, Laiza Krung, Laiza Hka ngu
nna tsun shamying wa ai re lam mi moi na n dai ginra na nga sai N’men Du kasha,
Salang N’men La Raw kaw n’na tsun hkai dan ai hpe na lu ai.
Laiza
ngu ai amying shingteng hpe mi moi kaw nna nga usa rai nga ai labau chye ai ni
gaw n ra sharawng ma nna Laiza ngu ai mying hpe dawm kau nna ndai ginra mare n
nan de hpang wa ai ten hta Hpungtau Hpaudut Yaw kaw nna, Alen Yang Mare ngu
Karai Kasang kaw kyu hpyi nna mying galai shamying kau yu sai re.
Raitim
daini du hkra, Alen Yang n ngu ai Laiza ngu nna gum-hkawng shamying wa ai lam
gaw, 1994 ning, K.I.O hte N.W.T Hpyen Asuya gap hkat sazim ai hpang Maigan
Mungdan ni de na bu hkawm masha ni langai hpang langai ndai shara de sa du
gawan nna ndai Laiza hkan san sagawn nna shi laika hkan n dau, Radio hkan K.I.O
a Ginjaw shara re lam ndau shabra re ai kaw nna, Alen Yang ngu ai mying shi
chyu shi bai prai mat nna, Laiza Mare ngu ai shingteng amying Maigan Mungdan
law law ni de gumhkawng mying pru wa nna grau grau rawt jat ai Laiza Muk Lum
ngu shamying wa ai re lam shachyen ya dat n ngai rai.
Laiza
Mare de hpang wa ai hta shawng nnan 1950 ning, grupyin hta ya na Ninggawn Daju
Gawgap da ai Nmyen Bum kaw Lahpai Du ni rai nga ai Nmyen Du ni hte htinggaw 5,6
shawng ningnan jawm de nga pra nga yang 1958 ning, Miwa Konmyunit tara n hkam
lu nna ya Miwa Mung rai nga ai Ga Du grup yin hte Sama Pungling, Wa Jau mayan
na Wunpawng ni htinggaw loi li bai sa jat nga nang nna ya na Laiza Lawk (1),
Hka Chyang Lawk hta Mare shawng ningnan de hpang wa ai majaw dai ni du hkra
Laiza Mare Lawk (1)ngu masat masa shamying da ai re.
Laiza
Mare hta 1962 ning, April shata kaw nna Wunpawng Mungdan Shanglawt Hpyen Hpung
du shang wa nna 1963 ning. May shata kaw nna Mungchying Upnkang Dap hpe hpaw
shabawn let, Munglai hka hte Namsan hka lapran hpe Na Lung Ninghtawn ngu, ya
Laiza Mare kaw nga ai Hpungtau Maran Naw Ninghtawn Uphkang Du No.(1) galaw
hpang nna Daw Hpum Yang Ginwang Daw Raw nna yu reng uphkang lai wa sai re. Dai
ten Daw Hpum Yang Ginwang Daw Du ,makan lit hpe U Htang Yang Mare kaw nga lai
wa sai Salang Udi Shawng gun hpai ai, Hpyen Dap hpe gaw Du Kaba Maran Brang
Tawng (4) Column Commander lit la rai woi shakut hpang wa ai re lam sagawn chye
lu ai.
Laiza
Mare gaw, Rawt Malan magam gun dinghku ni lani hte lani law jat wa sai. 1970
ning, daram kaw nna ya na Masat (1) Mung Shawa Tsi Rung mayan hta Dap Dung (3)
Hpyen Dap shara jahkrat wa ai kaw nna Numdaw (1) htinggaw law jat wa ai lam nga
ai. 1982 ning, September shata, Na Lung gasat poi kaba byin ai hpang, tai hpyen
wa hpe ding hkrai tawn masing ngu ai masing nga ai majaw mawdaw lam mayan, Na
Lung, Dinghkung, Hka Ya, Madi Yang, Maru Kahtawng hkan na mung shawa ni htawt
sit bang wa nna, No. (2) lang ngu na htinggaw grau law jat wa sai.
1987
ning, tinang GinJaw Ginra tai hpyen wa htu bang wa nna Namsan Yang maga mawdaw
lam mayan na hpyen yen mung shawa ni majoi du kaput shang bang wa ai kaw nna
hpyen yen dabang kaba hku nna, mung shawa htinggaw grau grau law jat wa ai hta
grau nna mare kaba byin wa sai majaw, 1993 ning kaw nna Laiza Mare kaw ngang
kang ai Asuya Lahta Tsang Jawng nta hpe Mungdan Asuya Ginjaw Hpaji Dap Lit la
nna gaw gap da lu sai.
1994
ning, tinang K.I.O Asuya hte hpyen Asuya gap hkat sazim nna Buga Gaw Sharawt
masing tatut hkrang shapraw wa ai hta Laja Yang hte Laiza mawdaw lam hpe htu
jahkrang la lu saga ai. Buga Gaw Sharawt masing lani hte lani dam lada wa sai,
Laiza Mare hpe mung K.I.O Ginjaw a Buga Gaw Sharawt mare kaba langai mi hku gaw
gap sa wa nga sai majaw Sadung Ginwang kaw nna yu reng Uphkang nga ai hta na
Laiza Mare hpe Laksan Ginjaw kaw nna dan tawk yu reng uphkang ai mare Uphkang
Rung hpe Ninghtoi;-1-6-1995 ya shani hpaw shabawn nna Laiza Mare hpe Laksan
Ginjaw yu reng uphkang ai kata Buga Gaw Sharawt lam hpe madung lit la woi awn
sa wa nga sai re.
Laiza
mare hta tinang Mungdan Asuya kaw nna Buga Gaw Sharawt matsing kata galaw gaw
gap da lu ai bungli ni.
(1)
1995 ning, May shata hta HPAGA HKA AWNG LAT NINGSHAWNG Hka ninggun mi-hprap Wan
Jak hpe galaw gaw gap la lu sai.
(2)
1999 ning, December shata (12) ya shani Salang Manam ni a lai wa lai sa hkring
sa manam shara, SIg. Manam Jarawp nta hpe gaw gap la ngut ai hte dingshawn poi
hpe kabu gara galaw la lu saga ai.
(3)
2002 ning, October shata (15) ya shani Laiza Mare shawa yawng a zuphpawng
shara, Zuphpawng Gawk-nu Kaba hpe Laiza Myu Lawt Wunli Htingnu ngu shingteng
amying shamying gaw gap la lu sai.
(3)
2004 ning, February shata (24) ya shani laizaMukLum kata Pru/ Shang ai bu hkawm
sha ni Laiza Muk Lum kata Pru/Shang ai bu hkawm masha ni hte hpaga masha ni
Jinghku jingyu jahkrum hkawm ai mung-chying shawa yawng hkring sa manam na
shara Laiza Hotel kaba hpe mung gaw gapda lu sai.
(4)
2004 ning, March shata hta Laiza Muk Lum Mare, Mare ka-ang lam kaba hpe ngang
kang tsawm htap ai Gatara nep ai lam mung galaw da lu saga ai.
HPAWNG
SHINGRA KABA GALAW AI LAM
(1)
1994 ning, February shata praw (5) ya hte (6) ya hta Laiza Lawk (5), ya galaw
nga ai Manau Pa a lam lawu maga Wunpawng Amyu sha ni dip da hkrum ai kaw na
rawt malan sa wa ai (33) ning hpring (34) lang na rawt malan masat dingsat Rawt
Malan Manau Poi Kaba hpe Ginjaw Ginra Pati Komiti lit la nna, woi galaw lai wa
sai.
(2)
2000 ning, February shata praw (5) ya hte (6) ya shani Laiza Lawk (5), ya Manau
Shadung jun da ai shara hta Ginjaw Ginra Pati Komiti lit la woi nna (39) ning
hpring (40) lang na rawt malan masat dingsat manau poi kaba hpe kabu gara hte
galaw awng dang la lai wa sai.
(3)
2002 ning, February shata (5) ya kaw nna (25) ya du hkra Wunpawng Mungdan
Sinpraw, Sinna, Dingdung. Dingda, Ginwang Ginjaw (4) hte Ginjaw Ginra Wunpawng
Mungdan Shanglawt Hpyen Dap, Dap Ba 1,2,3,4 Dap Nawng Daju shang lawm ai Ginjaw
Komiti Tingnyang Up a Ningjap Ninggang gashun gawdin ginsup poi kaba hpe mung
ngwi pyaw awng dang ai hte galaw la lai wa sai.
(4)
2002 ning, October shata (21) ya kaw nna (25) ya lapran Laiza Mare Myu Lawt
Wunli Htingnu hta Wunpawng Amyu sha Mungbawng Zuphpawng hpe No.(1) lang ngu na
myit hkrum kahkyin gumdin ai hte kabu gara galaw awng dang la nna, Wunpawng
Amyu Sha Mungbawng Rapdaw hpe mung hpaw shabawn la lu saga ai.
Ndai
lahta de galaw awng dang la lu ai Buga Gaw Sharawt ni yawng hte Wunpawng Amyu
Sha ni a myit hkrum gahkyin gumdin lam a ningpawt rai nga ai.
Manau
poi kaba, ginsup poi kaba ni yawng gaw K.I.O Ginjaw Komiti a myit mang masing
jahkrat ai kata hpyen asuya hte gasat gala shazim ai hpang na pu pu si si ai
mahtai malu ni re lam hpe Nu, Wa Mungchying shawa yawng de ka shaleng dat nngai
law.
Maling
Hkra U (Laiza Muklum)
.jpg)
