Sweet December Mungga

Hkum Hkrit Myit

(Sweet December Mungga)

“Dai majaw lamu kasa gaw, Hkum hkrit myit; yu mu, masha nlang a matu nachying kabu gara mai ai shi ga, ngai nanhte kaw gun sa ring ngai;” (Luka 2:10)

Chyoipra ai Chyum laika hta Kabu Gara Shiga laika (Mahte, Marku, Luka, Yawhan) hta ‘hkum hkrit myit’ nga ai ga si 18 lang rawng nga ai.

Ndai lahta na chyum daw gaw Lamu Kasa ni Sagu rem ai ni kaw Madu Yesu shangai wa sai lam sa tsun dan ai shaloi tsun ai Mungga rai nga ai. Lamu Kasa ni hpa majaw “Hkum hkrit myit:” ga nhpaw tsun a ta? Dai sagu rem ai ni hkrit taw ai hpe mu chye ma ai.

Sagu Rem ai ni hpa majaw hkrit a ta?

(1) Prang yang hkan sagu rem ai ni re, nga tsun ai. Rai yang, ndai ni gaw Sahti (Lauban) ni gaw n rai na re. Hpa majaw nga yang, Israela Mungdan grup yin a du hkra ladaw gaw shani kahtet nna, shana gaw grai kashung ai shara ni rai nga ai. Prang Yang kaw sagu hpe sin nna yup ai ngu ai gaw Sahti ni a bungli n rai nga ai. Dai majaw shanhte gaw nchyang ni rai yang rai na, shing n rai yang mung Sagu rem let gawhtawt gaw-yawt nga sha hkawm ai (Gypsy) masha ni rai yang rai na.

(2) Dai ten dai zawn matsan masha ni hkrit ra ai lam baw hpan amyu myu grai nga ai. Masha mazut (Gangster) ni, Damya ni, lagut ni, Roma hpyen la ni, mayam rim dut sha ai ni, Sagu sa rim sha na dusat ni, rai nga ai.

(3) Dai majaw shanhte gaw shawng nnan mu hkrup ai masha shagu hpe hkrit ai. Grau nna, shana yuptung pawpru wa ai lamu kasa ni hpe gaw n hkrit na lam n nga nga ai.

(4) Hpa hte bung ai i nga yang, anhte Buga kahtawng ni hkan, majan byin nga ai ten, shana yuptung mare shing nawm de gwi wau yang, mare ting sadi maja ai. Hkrit ai. Shana yuptung nta chyinghka sa akawk yang nta masha yawng hkrit ai. Dai zawn rai nga ai.

(5) Dai majaw, “hkrit ai” ngu ai gaw shimlam n lu ai ni a kumla rai nga ai.

Lamu kasa ni dai hpe chye ai, dai majaw, Hkum hkrit myit; “masha nlang a matu nachying kabu gara mai ai shi ga” gun sa ai, nga tsun ai. Raitim, dai ten Herod Hkawhkam zawn re ai ni n lu kabu ma ai.

Rai yang gaw, kade matu kabu hpa shiga ta?

(1) Gritnem dik ai, dip sha hkrum ai masha ni a matu kabu hpa shiga rai nga ai.

(2) Tengman ai lam hpe marit ai ni a matu kabu hpa shiga rai nga ai.

(3) Tara Rapra ai shingnip kata kaw Tara Upadi a shimlam hkam la lu mayu ai ni a matu kabu hpa rai nga ai.

(4) Kashun kashe re ai mungkan hpe n ju ai ni a matu kabu hpa shiga rai nga ai.

(5) Matse labye Mung up du ni hpe gumlang kau mayu ai ni a matu kabu hpa shiga rai nga ai.

Herod hkawhkam zawn re ai masha wa ntsa, mung shawa a ntsa, kam ai hku dip lu dip sha pyaw dum nga ai ni a matu chyawm gaw myit kahpra hpa tai wa sai.

Dai majaw, Ehpesu 6:12 hta
"Kaning rai nme law, anhte a gasat gala ai gaw, asai yan ashan hpe n re ai sha, du agyi ni hpe mung, ahkang aya lu ai ni hpe mung, ndai sin mak nga ai mungkan a hpung dagu rawng ai ni hpe mung, sumsing lamu lahta tang e nga ai. n hkru n hkra ai nat a luksuk ni hpe mung, gasat gala nga ga ai."

Ndai Hkristmas ngu ai gaw, Tara rapra ai lam hpe marit ai anhte amyu sha ni yawng a matu Kabu Hpa Shiga tai wa na sai kam nngai.

By : Rev.Hkalen Tu Hkawng