Jinghpaw Wunpawng Amyu sha ni a sai daw sai chyen ngu maram lu ai Vietnam Mungdan na Ede amyu sha ni

Ede traditional Dance

For more photo : https://bit.ly/2OXoO9V

Vietnam mungdan na Ede amyu sha ni hpe yu yang anhte Jinghpaw Wunpawng sha ni hte grai bung pre ai hpe yu maram lu ai. Ede amyu sha ni a htunghking bu hpun sunli lam, kahkrang, makam hkri dun lam, nga sat nga sa lai len ni hta anhte JW amyu sha ni hte grai bungpre ai ginlam ni law law hpe mu mada lu ai. Grau nna bung ai gaw dum nta hkrang ni re.

Dum nta hpe anhte J.W sha ni a moi na dum nta ni zawn sha nta galu yen di gap nna, hku wawt n lawm ai sha maka hpan hkum shakap da ai hpe mu lu ai. Gaw gap da ai shinggan kata hkrang yawng gaw anhte J.W amyu sha ni a dum nta hkrang ni hte grai nan bung nga ai.

Vietnam majan ten 1970 jan laman hta Miwa mung na, miwa hpyen la ni mung majan sa gasat lawm ma ai. Dai miwa mung hpyen la ni hta anhte W.P sha ni mung ram ram lawm ai. Dai kaw lawm ai hpyen Du langai, ya gaw Miwa gumsan mungdan Mangshi mare hta shanu nga ai, Sakhkung Mungdaw na Kai Chyan Du Kaba Htoi Ma-rip mung shanhte hpyen hpung ni Vietnam majan ten hta Vietnam mungdan kata na mare kahtawng law law hta Jinghpaw ga shaga ai masha law law hte hkrum kau da ai lam jahta dan ga ai.

Ya n nga mat sai Labau munu kaba Sr. Kaba Dr. Maran Ja Gun mung Vietnam Mungdan hta anhte Jinghpaw Wunpawng amyu sha ni sen mi jan ram nga nna, law malawng gaw Maru ga shaga ai lam tsun jahta dan ga ai.

Miwa Gumsan Mungdan na Ginru Ginsa Labau Sawk Sagawn Ninghkring Du Kaba Manam Tawng mung, moi anhte JW sha ni, Miwa gumsan mungdan a sinpraw maga, Inner Mongolia kaw nna ginru ginsa htawt hkrat wa ai hta, AD shawng daw ten, bum marawn hka panglai hku hkan nna, lam law law hku bra ayai bu htawt hkawm mat ai lam tsun dan ga ai. Dai zawn htawt hkrat wa ai hta, nkau gaw Pat Koi Bum hpe lai di nna, Hkakaburazi bum marawn hku hkan let ya na JInghpaw Mungdaw, Myen Mung de htawt shang wa ai. Nkau gaw sak hkung hka hku hkan let ya na Miwa Gumsan mung, Yunan ga sakhkung mung daw de htawt shang shanu mat ai. Nkau gaw Gala mung Arunacha mungdaw de htawt shang mat nna, nkau gaw dai lam ni yawng hku koi mat let, Vietnam, Lao, Cambodia mungdan ni de htawt shang, ginru ginsa yu hkrat mat ai lam tsun hkai dan ga ai.

Dai majaw ndai lawnglam ni hpe lakap nna, ya mu mada ai Vietnam Mungdan na Ede amyu sha ni hte anhte JW amyu sha ni a matut mahkai lam ni gara hku nga ai hpe gaw, lawng lam law law hku naw sawk sagawn sha-ngang shakang la ra nga ai hpe mu mada ai.

Namsim Tsabawk