2017 ning hpe shakram nna, 2018 de shang wa ai ten, ATEN hte seng ai lam kadun mi garan kachyan dat nngai; aten lu jaw ai ni hti la nna akyu hkam la lu na myit mada nngai.
Aten hte Shinggyim masha a lit (Time and human responsibility)
Minute, sekkan, nayi hkying hkum, shani shana hte shaning shata ngu ai ATEN gaw n hkring n sa lwi yawng nga ai hkanu hkashi hte maren sha, nhkring nsa shi ladaw langa a ritkawp the maren lwi lai dingyang rai nga ai. ATEN a galai shai ai masa ‘principle of change’ hta, (a) hpang de bai nhtang ai lam nnga ai (no turning back), (b) malai ngu nnga ai (time cannot be substituted), (c) shi aten hte aten lit lu ai (each time has its own task); hte (d) shawng de ding yang lahkam ai (time moves forwards gradually). Shinggyim masha gaw ndai galai shai ai aten a masa hpungla e kashun kashe rai hkan hpung yawt shachyut nang let, si htan ntsang rai, aten hte kamu hkat nna asak hkrung lam hpe gawgap ai masa rai nga ai.
Aten hte De a Shingdu na lachyum ( Time and Its Meaning behind)
Shinggyim masha gaw aten hte kamu kumchyi hkat let asak hkrung ai sha n rai; Dai galai shai ai ATEN masa a lachyum hpe htai shapraw na matu lit mung lu nga ai. Chyum Laika hta, ‘Anhte gaw myit hpaji lu la hkra, Anhte a nhtoi chye hti lu na sharin ya mi” (Shkd 90:12) nga tsun ai. Myit hpaji hpe English NRSV hta, ‘wise heart’ nga ai. Galai shai ai aten ladaw shaning shata ni e shinggyim masha hpe lachyum shapraw dan nga ai hpe, Karai a hkrang bung shinggyim masha ni chye na hkawn ra ai lachyum rai nga ai.
Shinggyim masha nan mung galai shai ai aten a ‘bawng masha’ (victim) rai nga ai. Aten a matsun ritkawp tup hkrak hkan yang chyu sha awngdang galu kaba wa na rai nna, aten ritkawp matsun hpe lale jang, asak hkrung lam a lit hpe hprai kau nga ai. Ndai lit hpe hprai kau ai gaw, grai tsang hpa rai nga mali ai. Lahta na (c) “kaw tsun ai hte maren, aten gaw shi ten hte shi hprai nmai ai lit lu ai” (each time has its own task). Shinggyim asak hkrung lam hta, ningpawt kaw nna ngap ngap rai gaw shachyawm mahkawng shinggyim rai ai lam rai nga ai. Shawng galaw na hpe hpang e galaw jang hka kap mat ai; dai hka hpe galoi nmai wa ai, dai hpe wa ai nga jang, kalang bai aten hka kahtap kap mat ai. Ndai hku matut manoi rai wa jang, masha a asak hkrung lam gaw baw pyi nlu sharawt na daram re aten hka tsip tai mat nna, shawng de sit na n mai byin mat ai. Masha nan gaw shamu nga, asak mung kaba jat wa ding yang rai nga tim, myit hpaji n jat ai, manu namnak hkring ai, shawng kaw na nga nga sai pyi yawm ginyoi mat ai lachyum de gale wa lu nga ai. Dai majaw, (a) Aten hpe n lahpawt kau na nachying ahkyak nga mali ai; (b) galai shai ai aten ahkying, labau maka ni gaw hpa baw lachyum shapraw nga ai ngu ai hpe tut nawng lek nna dinglik mahtai shapraw la na lit n mai hprai nga ai.
Dai hte maren, amyu sha lam hku yu yang, Anhte a matu ahkyak dik ten gaw ya ten rai nga mali ai. Ya aten hta zim nga ai wa gaw labau hka kap na rai nga ai. Dai hka hpe hpang e bai wa na nga jang, hpang na bungli hpe bai hprai kau na rai nga ai. Amyu sha ni a matu si hkrung si htan daram ahkyak ai aten, amyu sha marai hkum shagu, tinang nga ang ai shara hta, aten hka n kap hkra amyu sha magam hta gunhpai lu na nachying ahkyak nga mali ai. Amyu sha bungli hta hka shakap da ai kadai n lawm na hpe myit mada nngai.
Signs of the Time as history (Aten a maka gaw labau)
Aten ngu ai shaloi, anhte a labau rai nga ai. Labau gaw aten a kumla ni hpe shapraw ai hku sa wa nga ai. Mabyin masa shagu a Shingdu e lachyum hkan nang nga ai. Dai majaw, aten ladaw shaning shata galai wa ai ten hta, labau hpe nhtang myit yu nna lachyum bai shapraw ra nga mali ai. Choan-Seng Song ngu ai Sarakaba wa tsun ai hta, ‘history is not to be memorized, but to be interpreted – labau ngu ai gaw bawnu hte matsing da na matu sha n re, lachyum htai shapraw na matu re’ nga ai. Anhte a matsan tsin-yam (suffering) a labau mung chyinghkraw galu nga ai; ningbaw ningla ni pyi ban hte ban galai wa sai; hkrum sha ra ai ru yak gaw grau grau laja lana rai wa nga ai. Myen mung masa hte Miwa-Myen sut hpaga mung sang masa maden shachyai ai tauwang kaw anhte a lam wa, yup nmai, sha n mu rai nga mali ai. Anhte a magam bungli n ngut kre shi ai hpe lachyum madun ai sha n-ga, anhte amyu ni grau grau myit mang shabawn let, sai ninghtan rap ra, ningmu, nsen makai madawng nna n-gun kaba hte grau bungli ningsam dat ra na lam hpe madi madun nga ai. Anhte Wunpawng mungdan ngu tsun nga ga tim, ta tut hta Wunpawng Mungdan a lachyum majing gaw Shanglawt ni up ai daw kaw chyu sha rai nga mali ai. Ndai hpe yu yang, anhte a lata na lamu ga, shara, dap ni tat kau ai mung hkrit hpa kaba rai nga mali ai.
Matut nna aten ladaw a kumla ni gaw anhte hpe hpa naw tsun nga ai kun? dinglik mahtai shapraw na Myit hpaji grau hpring tsup wa mi ga law.
2018 ning hta Awng Padang Chyeju hpring nga mali ga!
.jpg)
