HKRISTAN MAKAM HTE MUNG MASA (2)

Mung masa a lachyum hpe shawng na laika kaw shaleng dan ni ai. Shinggyim masha nan mung masa re majaw, shinggyim masha nga ai kaw mung masa nga ai lam mu lu saga ai. Ning ngu ai shaloi, ga san bai kahtap san ra wa ai. Hkristan ni gaw kadai ni rai ma ta? Mung masa galaw ai ni gaw kaning re laklai ai ni rai ma ta? Hkristan ni mung, mung masa galaw ai ni mung ‘SHINGGYIM MASHA’ sha n rai ma ni?

Hkristan ni mung wenyi kade hpring, hkru kat tim, hkum hkrang a matu shat nsha nna gaw kadai nlu nga ai. Si na gaw yawng hkrit ai hkrai rai nga ai. Si nhkrit ai wa gaw lama ma ra rawng ai wa sha a rai nga ai. Dum nta mung gap rawng ra nga ai. Bu hpun palawng mung tsawm tsawm hpun mayu nga ai. Tsawm mayu nga ai; dai majaw, nkau mi gaw tinang a hkum hkrang hpe pyi hpya shatsawm, di shakap, kapa rai kyin bu nga ma ai. Myit simsa lam, hkamja asak galu na lam hpe yawng wa ra nga ai. Aten hpe shachyut nna bungli galaw sha ra nga ai. Akyu hpyi sai majaw, ndai lam ni n-galaw ra sai, kadai n nga na re. Lama nga dam tim, myit ana kap ai ni sha rai na nhten!

Ndai hta loi lung nna myit ga nga yang, Karai Kasang hpe nawku ai pyi, tinang a ga hte nawku jang she ai htep nga dum nga ai. Dai nan, amyu rusai hpe manu shadan, myit mangoi ai lachyum rai nga ai. Tinang a ga hpe Tsawra ai, tinang a ga shaga mayu ai nga yang, dai zawn myit bung ai ni kahkyin majaw wa jang, ga nbung ai ni hte shi hkrai shi kaga san san rai mat ai. Dai kaw nna, amyu, ru sai ngu ai de bai matut lung mat wa ai. Dai kaw nna gaw, amyu rusai nbung ai shinggyim masha ni a lapran na mahku mara mahkrun, namnak shadang hpe bai yu wa ai. Lachyen lahka, dip kamyet ai lam hpe hkamsha jang, nhkru ntra lam re ngu gumlang mayu wa ai. Lawt pru mayu wa ai. Tinang a laksan rudi maka (identity) hpe grau mazing sumhting mayu wa ai. Ndai hku byin na matu nan, Karai Kasang hpan da hpajang da nga ai (NN.10; 11). Ndai tsun lai wa sai lam ni nan ‘mung masa’ hpe shangai shaprat ai jakrung rai nga ai zawn, makam masham (religion) a hkadeng mung rai nga ai. Yawng gaw shinggyim maka (human nature) kaw ningpawt nga ai.

Hkristan rai nna, wenyi lam san san sha ngu ai gaw, majoi mi a tsun ai lam sha rai nga ai. Hkumhkrang lagaw lata, n-gup, kan, myi na hte asak hkrung ai mungkan shinggyim masha rai da nga nna me, wenyi lam san san ngu ai gaw, ‘makam jahten’ a agung katut nna bri ai ni a ga sha rai nga ai. Chyum Laika buk ting gaw, shinggyim labau, shinggyim Manghkang hpe gara hku hparan na lam sharin ya nga ai. Wenyi lam san san ngu ai masa hpe n mu lu ai. Ndai lam ni gaw, mung masa lam hte Hkristan makam hpe kaga ga di karan kau nmai ai lam a sakse ni rai nga ai.

Hkristan ni gaw kaga Hkristan nre ai shinggyim masha ni hte nbung ai hkumhkrang lu da ai ni nrai nga ai. Kaga ni hte maren sha rai nga ai. Dai majaw, shinggyim masha – humanity hte seng ai lam ni yawng hte matut mahkai, mahkri shawn asak hkrung nga ai ni re. Nre, nga tsun ningdang ai wa gaw, madu hkum madu a lam nchye na ai wa sha rai nga ai. Shing nrai, ahkaw ahkang lama ma a majaw, tsun shakut ai lam sha rai nga ai. Kadai nchye ai ladat hku gumrhpaw grau mahkawng shakut ai wa pyi rai nga ai. Hkristan ni mung kaga ni hte maren shinggyim masha sha rai nga ai hpe malap masu nmai nga ai. Nang akyu hpyi shaja nna lama ma lu jang, Karai Kasang hpe Chyeju dum ra ai gaw teng ai; raitim, nang hpe sa jaw ai wa hpe shawng Chyeju kaba sai yaw, ngu tsun na hprai kau jang, nang hpe Karai Kasang jaw ai shinggyim lit hpe hprai kau ai lam rai nga ai.

Hkristan re majaw machyi ti mung tsi n sha ra, tsi rung n sa ra ai hku n rai nga mali ai. Machyi makaw lam yawng gaw tsi rung e hparan ra ai manghkang rai nga ai, nawku jawng de hpai sa ai baw nrai nga ai. Tsi rung greng grak kaja na, ra ai tsi mawan hkum hkum tsup tsup lu na, tsi lajang ai lam hta myit masin hpraw san ai hte machyi mai tsai wa na matu madung dat tsi lajang ai lam, shing nrai, gumhpraw n lu jaw jang si yang si n lu tsi lajang ya ai lam ni gaw mung masa lam yan a mahtai rai nga ai.

(bai matut na)

Zau Nan Langai