"Wa Si Hka hta, Majoi Joi Wa" Ngu ai Ga Malai Byin Wa Ai Lam

Mangshi Manau Poi hta Htunghking malu masha sha taw ai sumla /Photo : FB

Shawng de, mare langai mi hta dingla langai gaw nrim rim wa ai ten e..htingbu htingwan de wam hkawm chyai ai da. Dai zawn wam hkawm ai shaloi; wa hkyi kabye hkrup ai da. Wa hkyi kabye hkrup nna kashawt ai hte rau, nga hkyi sumpum hpe mung kabye magra hkrup sai da. Shaloi shi gaw, shi chyu chyu grai pawt nna, wa kasha kabye sai law ngu, marawn jahtau ai da.

Hpang shani rai yang, ang sha-à rai dai shara kaw wa kasha langai si taw ai da. Dai hpe wa kasha madu ni gaw mana de marawn jahtau ai dingla wa kabye sat ai re ngu myit la nna, dai dingla hpe shawa sha ma ai da.( kaja wa nga yang, dai wa chyasi gaw dingla hpe manawn ai wa e sa tawn da ai re da).

✏ Aten ahkying hta hkan nna ga shaga chye ra ai, tinang a pawt mayu ai myit hta n mai machyu ai, tinang hpe manawn ai ni, tinang a hpyen ni gaw galoi mung tinang hte yep re, tinang mi n rai tim, ga shaga shut ai a nhkan e, hka wa ra wa ai ✏

Wa hkyi kabye ai hpe wa kasha kabye sai ngu tsun shut ai sha pyi, hka wa ra ai. Ndai hta grau ahkyak ai lam ni hta gaw grau nna sadi maja let tsun shaga ra ai. Dai majaw, moi na ni gaw, "wa hkyi kabye na lu, wa si hka hta tai na lu" nga nna tsun shadum hkat ma ai...

Ndai ga malai hte lachyum bung nga ai ga malai ni gaw;...

✉ Ga baw ja shaw, ga hta ja da.

✉ Ga tsun ga law, bau dum bau waw.

✉ Udi hta sha ai gaw Uhka, ninggung katut ai gaw Ngai. nga ai ga malai ni rai nga ai law....

 Shapawng Yawng Jinghpaw ga malai laika buk, laika man 120

Npawt : Visit